កីឡាករបាល់ទាត់យុវជនមកពីខេត្តព្រះវិហារ ផ្ទេរមកចូលរួមជាមួយក្រុមយុវជននៃក្លឹបបឹងកេត

ជាថ្មីម្តងទៀត ទំព័រប្លុករបស់ក្រុមបាល់ទាត់ព្រះវិហារស៊ីធី សូមធ្វើការលើកឡើងម្តងទៀតអំពីដំណាក់កាលនីមួយៗនៃការធ្វើតេស្តសមត្ថភាព ដើម្បីចូលរួមក្នុងក្រុមយុវជននៃ ក្លឹបបាល់ទាត់បឹងកេត ដែលជាក្លឹបអាជីពមានឈ្មោះល្បីល្បាញមួយដែលកំពុងលេងក្នុង លីក របស់ប្រទេសកម្ពុជា ។
កីឡាករ ណាយ ឆេងប៉ាវ​ បានធ្វើការផ្លាស់ទីលំនៅ និងកន្លែងសិក្សាទៅរាជធានីភ្នំពេញហើយ បន្ទាប់ពីបានធ្វើការតេស្តសមត្ថភាពដោយជោគជ័យជាមួយក្រុមយុវជននៃក្លឹបបាល់ទាត់បឹងកេត។
សូមបញ្ជាក់ថាបន្ទាប់ពីទទួលបានសេចក្តីជូនដំណឹងស្តីពីការជ្រើសរើសកីឡាករយុវជនរបស់ក្លឹបបឹងកេត ក្រុមបាល់ទាត់ព្រះវិហារស៊ីធី សហការជាមួយក្រុមការងារគ្រប់គ្រងនៃសាលាបាល់ទាត់តម្រង់ទិសវិទ្យាល័យជាស៊ីមត្បែងមានជ័យ បានបញ្ជូនកីឡាករយុវជនចំនួន ០៣នាក់ គឺកីឡាករ វ៉ា តារា,កីឡាករ ណាយ ឆេងប៉ាវ និង កីឡាករ ហេង ពេជ្រ ដើម្បីចូលរួម ធ្វើតេស្តជ្រើសរើសយុវជនថ្នាលក្រោមអាយុ ១៧ឆ្នាំ រយៈពេល ២ថ្ងៃ ចាប់ពីថ្ងៃទី៥-៦ ខែមករា ឆ្នាំ២០១៩ នៅរាជធានីភ្នំពេញ ដោយមានយុវជនជិត ២០០នាក់បានមកចូលរួម ដោយពួកគេមួយចំនួន បានធ្វើដំណើរមកពីខេត្តផ្សេងៗចំនួន ១៧ខេត្ត-ក្រុង និងមាន០២នាក់ មកពីប្រទេស ញ៉ូស្សឺឡែន។ជាលទ្ធផលបានទទួលជោគជ័យដោយជាប់  shrt listក្នុងចំណោម៣១នាក់ ចំនួន ០២នាក់គឺកីឡាករ ណាយ ឆេងប៉ាវ និងកីឡាករ វ៉ា តារា ។ រយៈពេល១០ខែ ក្រោយមក ពោលគឺនៅដើមខែតុលា ឆ្នាំ២០១៩ កីឡាករទាំងពីរនាក់ត្រូវបានកោះហៅចូលធ្វើតេស្តសារថ្មីម្តងទៀតដោយត្រូវប្រើរយៈពេលពីរសប្តាហ៍គឺចាប់ពីថ្ងៃទី៦ រហូតដល់ថ្ងៃទី១៩ ខែតុលា ឆ្នាំ២០១៩ ជាលទ្ធផលចុងក្រោយ យើងបានទទួលជោគជ័យ ជាប់ជាស្ថាពរ ចំនួន០១នាក់ ប៉ុណ្ណោះ គឺកីឡាករ ណាយ ឆេងប៉ាវ ។

សូមបញ្ជាក់ថាខេត្តព្រះវិហារមានកីឡាករចំនួន ០៣នាក់ហើយដែលកំពុងលេងអោយក្រុមយុវជននៃក្លឹបអាជីពនៅក្នុងព្រះរាជាណចក្រកម្ពុជា ទី១គឺកីឡាករ លីន ដារ៉ាដេវីដ និងទី២ កីឡាករ អ៊ុក សំអេង យុវជនទាំងពីរនេះកំពុងលេងអោយក្រុមយុវជននៃក្លឹបវិសាខា និងទី៣ កីឡាករ ណាយ ឆេងប៉ាវ ដែលត្រូវផ្លាស់ទៅក្រុមយុវជននៃក្លឹបបឹងកេត។

រូបភាពចូលរួមធ្វើតេស្ត កាលពីខែមករា

រូបភាពចូលរួមធ្វើតេស្ត កាលពីខែតុលា

រូបភាពការធ្វើតេស្តលើកចុងក្រោយ